Tisma' Spiss

Kliem:	Joe Julian Farrugia
Mużika:	Renato Briffa
Tkanta:	Natasha Grima

Tisma' spiss
min iparla dwar żgħażagħ żgħar
li ħsiebna biss fiż-żfin,
li fix-xogħol qatt ma ntajru nar.
Tgħidulna moħħ ir-riħ,
Titħassruna li għadna tfal,
li f'xejn ma nifhmu sew,
li f'ħajjitna m'hemmx idejal.

Kemm tgergrulna għas-sewqan,
għall-istorbju tal-mutur.
Tistaqsuna il-ħin kollu
ma' min kont u fejn qed tmur?

Tippridkawlna fuq il-ħruġ
għax li nilbsu mhux pulit.
Min iqum għal drittijietu,
dak ardit.

Aħna l-wirt ta' dak li intom
fassaltulna f'din il-ħajja,
aħna wlied ta' soċjetà
"min l-aqwa jħawwel".

Friegħi ta' zokk mgħawweġ,
aħna l-frott ta' siġra msewsa;
tippretendu li f'ħajjitna
nkunu anġli fl-art?

Xi ftit moħħ ir-riħ,
titħassruna li għadna tfal
li f'xejn ma nifhmu sew,
li f'ħajjitna m'hemmx idejal.

Aħna s-sinsla tal-futur, kollu fuqna jaqa' l-piż
Biex immexxu dak li intom ħallejtulna f'dal-pajjiż.
Tistennewx mirakli f'salt, tistennewx xi ħwejjeġ kbar.
Nagħmlu biss dak li jidhrilna jkun l-aħjar.

Aħna l-wirt ta' dak li intom
fassaltulna f'din il-ħajja,
aħna wlied ta' soċjetà
"min l-aqwa jħawwel".

Friegħi ta' zokk mgħawweġ,
aħna l-frott ta' siġra msewsa;
tippretendu li f'ħajjitna
nkunu anġli fl-art?

Twissuna u ttambrulna,
jew jaqaw insejtu żmienkom?
l-istorja qatt ma tieqaf,
kontu bħalna wkoll.

Xi ftit moħħ ir-riħ,
titħassruna li għadna tfal
li f'xejn ma nifhmu sew,
li f'ħajjitna m'hemmx idejal.

Dak l-idejal li f'moħħna
ħadd ma jħassar u fil-qalb
irridu l-ferħ u mhux paroli vojt,
kif tisma' spiss.

© 1995-2005 Youth Travel Circle.
Mużika u lirika © l-awturi u kompożituri.
Homepage (disinn, produzzjoni) © Ramon Casha .